Emisari i Bashkimit Evropian për dialogun Kosovë – Serbi, Miroslav Lajçak, vlerësohet se ka marrë mbi supe misionin e “zbutjes së tensioneve” në mes të Prishtinës e Beogradit.
Kështu është bërë e ditur nga rrjeti mediatik “Euroaktiv” përmes një shkrimi, ku kjo e fundit është e specializuar në çështjet e BE-së, duke raportuar për situatën e krijuar për rregulloren e re të Bankës Qendrore të Kosovës, e cila hyn në fuqi me 1 shkurt për ndalimin e qarkullimit të dinarëve dhe çdo valute tjetër monetare përveç euros.
Në publikimin e “Euroactiv” theksohet se këtë mision të ri e ka konfirmuar zëdhënësi i BE-së, Peter Stano.
“Zëdhënësi i BE-së Peter Stano përmendi se Lajçaku do të vizitojë Prishtinën si pjesë e përpjekjeve të vazhdueshme për të ndihmuar partnerët të çojnë përpara dialogun”, thuhet ndër të tjera.
Tutje, specifikohet se presidenti serb Aleksandar Vuçiq të hënën në takim me Lajçakun ka theksuar “nevojën urgjente për zgjedhje në veri të Kosovës, formimin e Komunitetit të Komunave Serbe dhe kërkoi mbështetjen e BE-së për ndalimin e provokimeve të mëtejshme nga Prishtina”.
Vizita e Lajçakut në Beograd i paraprin zbatimit të pritshëm të rregullores së Bankës Qendrore të Prishtinës, që e bën euron valutën e vetme për transaksione në Kosovë.
Euro ka qenë monedha e vetme që ka pasur të drejtën e qarkullimit sipas ligjeve të Kushtetuës së Kosovës. Tashmë BQK-ja ka bërë publik synimin e zbatimit të kësaj rregulloreje.