Policia e Kosovës në bashkëpunim me EULEX-in kanë kryer bastisje në një objekt në qendër të Zveçanit, ku janë gjetur dhjetëra thasë me rërë.
Lajmin për Dukagjinin e ka konfirmuar zëvendësdrejtori i Policisë së Kosovës për rajonin e veriut, Veton Elshani, i cili ka thënë se në të kaluarën thasët me rërë janë shfrytëzuar nga grupet terroriste serbe në kohën e barrikadave.
Ai ka bërë të ditur se autoritetet kanë marrë informacione se në objektin që ndodhet në hyrje të Zveçanit nga drejtimi i Mitrovicës Veriore ka potencialisht “diçka të kundërligjshme”.
“Policia e Kosovës ka pranuar informacione se në një objekt publik ne komunën e Zveçanit, ka disa gjera materiale, të cilat janë shfrytëzuar nga grupet terroriste serbe në kohën e barrikadave. Sot, gjatë kontrollave që ka bërë policia, ka konstatuar se në katin e tretë të kësaj ndërtese janë dhjetëra thasë të mbushur me rërë që kanë qenë si istikame për të sulmuar policinë dhe në mbrojtje të barrikadës dhe kontrollimit të rrugës kryesore që të dërgon në Zveçan”, ka thënë Elshani.
Sipas tij, ky objekt publik është shfrytëzuar nga pjesëtarët e organizatave terroriste si Mbrojtja Civile dhe Brigada e Veriut.
“Kjo është gjithashtu një dëshmi se grupet kriminale ishin të armatosur rëndë dhe kishin plane për të sulmuar Policinë e Kosovës, në rast se do të përpiqeshin të largonin barrikadat”, ka thënë tutje ai.
Po ashtu, Elshani ka thënë se, sipas informacioneve që kanë pasur, këta thasë me rërë mund të përdoreshin sërish në të ardhmen.
Kujtojmë se më 10 dhjetor 2022, serbët lokalë kishin ngritur barrikada në shenjë pakënaqësie për arrestimin e një ish-pjesëtari serb të Policisë së Kosovës, Dejan Pantiq, për të cilin autoritetet në Kosovë thonë se ka organizuar sulmet ndaj zyrave të Komisionit Qendror të Zgjedhjeve në veri.