Kryeministri i Kosovës, Albin Kurti, ka njoftuar se platforma “Superpuna” do të zgjerohet duke lejuar subvencionimin e punësimit edhe për të rinjtë deri në moshën 29 vjeç.
Kryeministri Kurti, gjatë prezantimit të këtij zgjerimi, ka theksuar se mbi 9 mijë të rinj tashmë janë punësuar përmes kësaj platforme.
Në fillim, platforma ka ofruar subvencione për grupmoshën 18-25 vjeç, por tani është zgjeruar deri në 29 vjeç.
Kryeministri Kurti pasi ka përmendur sukseset e platformës, ka thënë se fjala kryesore në prezantimet e tyre është “punë dhe drejtësi”.
“Punë dhe drejtësia është togfjalëshi që është dëgjuar më së shpeshti në prezantimet tona. Kjo platformë për bizneset e bëri më të lehtë angazhimin e punëtorëve pasi garantoi subvencionim e pagës së punëtorëve. Platforma ka pasur një sukses të jashtëzakonshëm, ku u punësuan 9394 të rinj dhe të reja. Jam shumë i lumtur që disa prej përfituesve i kemi në mesin tonë për t’u dhënë edhe një lajm të mirë. Kemi vendosur që t’i zgjerojmë grupmoshat që mund të përfitojnë nga kjo platformë, tani nga 18 vjeç deri në 29 vjeç mund të përfitojnë për t’u punësuar”, ka deklaruar Kurti.
Ministri i Financave, Punës dhe Transfereve, Hekuran Murati, ka thënë se synimi ishte punësimi i 10 mijë të rinjve dhe aktualisht 67% e punësuarve përmes kësaj platforme kanë vazhduar kontratat e tyre me punëdhënësit.
“Duke parë suksesin e grupmoshës së parë, kemi vendosur të zgjerohet grupmosha për ata që janë më shumë se 25 vjeç. Pra, nga ata që kanë përmbushur gjashtëmujorin, janë 67 për qind e tyre që kanë përfituar punësim. Ndryshimet, do të vazhdojnë kushte dhe kriteret e tjera siç kanë qenë”, ka thënë ministri Murati.