Zëvendëskryeministrja dhe ministrja e Punëve të Jashtme dhe Diasporës së Kosovës, Donika Gërvalla, në kuadër të vizitës zyrtare në Austri, ka mbajtur një diskutim me studentët nga Universiteti i Salzburgut.
Para studentëve, Gërvalla ka prezantuar rritjen ekonomike, zhvillimin e demokracisë dhe shumë tema të tjera lidhur me Kosovën.
Po ashtu ministrja ka folur dhe rreth sigurisë në Kosovë, sulmit terrorist në Banjskë të Zveçanit më 24 shtator të vitit të kaluar, sulmet ndaj KFOR-it, kërcënimet dhe shantazhet kundër qytetarëve serb në veri nga grupe të caktuara ilegale si dhe menaxhimin efikas dhe profesional të situatës në veri nga Policia e Kosovës.
Në njoftim thuhet se studentët dhe profesorët kanë shprehur interesimin e tyre edhe për qendrimet e ministres Gërvalla rreth rezultateve të pritshme të Konferencës së Sigurisë në Mynih, agresionin rus në Ukrainë dhe të ardhmen e Ballkanit Perëndimor.