I dërguari i Shteteve të Bashkuara të Amerikës për Ballkanin Perëndimor, Gabriel Escobar, pritet të takohet me kryeministrin e Kosovës, Albin Kurti.
Çështja e dinarit serb dhe tema të tjera pritet që Escobar t’i diskutojë me kryeministrin Kurti, të enjten.
Escobar të mërkurën është takuar me presidenten e Kosovës, Vjosa Osmanin dhe me përfaqësuesit politikë të serbëve në Kosovë, me të cilët, ka biseduar për problemet që po ballafaqohet komuniteti serb.
Para nisjes së vizitës në Kosovë, Escobar deklaroi se vendimi i autoriteteve të Kosovës për ndalimin e përdorimit të dinarit serb ishte “katastrofik” dhe “jokompetent”.
Ai tha se SHBA-ja nuk e konteston legjitimitetin e vendimit, por ka probleme me mënyrën e zbatimit dhe ndikimin që rregullorja e BQK-së ka në komunitetin serb.
Çështja e dinarit ishte edhe temë e dialogut ndërmjet Kosovës dhe Serbisë më 27 shkurt në Bruksel. Por, takimi përfundoi pa rezultat konkret dhe i dërguari i posaçëm i Bashkimit Evropian për dialogun Kosovë-Serbi, Mirsllav Lajçak, tha se ka nevojë për mbajtjen e takimeve shtesë.