Kombëtarja e Kosovës U19 në futboll në kategorinë e meshkujve, do të përballet sot me Austrinë U19, në kuadër të “Elite Round”, për kualifikim në Evropianin e këtij viti.
Të gjitha ndeshjet do të zhvillohen në Slloveni. Përveç Austrisë, në Grupin e parë kualifkuese bashkë me Kosovën janë edhe Spanja dhe Sllovenia.
Kosova U19 po drejtohet nga përzgjedhësi Adil Maliqi, i cili arriti sukses duke e kaluar raundin e parë kualifikues.
Përfundoi si e dyta në grup me 5 pikë, pas Ukrainës që u rendit e para. Edhe pozta e dyta mjaftoi për kualifikim në “Elite Round” Maliqi ditë më parë publikoi listën e lojtarëve të ftuar, e ku pjesë e listës janë vetëm dy lojtarë që luajnë në Kosovë, Elvir Gashijani i Llapit dhe Igball Jashari i Prishtinës.
Kjo është hera e dytë që Kosova U19 ka arritur në këtë fazë të kualifikimeve. Më herët suksesin e njëjtë e kishin arritur “Dardanët” e rinj me trajnerin Ramiz Krasniqi.
Në Evropian do të kualifkohen vetëm përfaqësueset që përfundojnë në vendet e para në shtatë grupe sa janë në këtë fazë.