Ambasadori i Shteteve të Bashkuara të Amerikës, Jeff Hovenier, pas takimit me zëvendëskryeministrin, Besnik Bislimi, është shprehur optimist se takimet e djeshme të kryenegociatorëve në Bruksel patën “disa shenja pozitive” për ta zgjidhur çështjen e dinarit.
“Është mirë të shohim që ka mundësi që të dy palët ofrojnë rrugëzgjidhje se si mund të bëhet kjo, si dhe përgjegjësitë e zotit Lajçak”, ka thënë Hovenier.
Hovenier: Të ndryshohet mënyra e zbatimit të Rregullores së BQK-së
Ambasadori Hovenier gjithashtu ka thënë se SHBA-ja kërkon ndryshimin e mënyrës së zbatimit të Rregullores së re të Bankës Qendrore të Kosovës për operimin e parasë ‘cash’, e që ndalon dinarin serb.
“Jemi të shqetësuar për atë se kjo mund të ndikojë te popullata e cenueshme, posaçërisht te komuniteti serb”, ka thënë Hovenier.
Bisedimet në Bruksel përfunduan me zotimet e palëve që deri më 22 mars t’i dorëzojnë propozimet e tyre për zgjidhjen e çështjes së përdorimit të dinarit serb në Kosovë.
Lajçak ka theksuar se bisedimet të vazhdojnë të hënën e ardhshme dhe se palët deri të premten do të dorëzojnë propozimet e tyre.
Kurse rregullorja e re e BQK-së ka hyrë në fuqi më 1 shkurt të këtij viti, pavarësisht kundërshtimeve nga ndërkombëtarët. Si rezultat i fuqizimit të kësaj rregulloreje u ndalua qarkullimi i valutave tjera, pos euros.