Në 25-vjetorin e Masakrës së Izbicës, Memli Krasniqi, kryetari i Partisë Demokratike të Kosovës, ka kujtuar këtë masakër, në të cilën, mbetën të vrarë 147 persona.
Krasniqi është shprehur se kjo masakër e kujton çmimin e shtrenjtë të lirisë që e ka paguar populli ynë.
Sipas Krasniqit, shteti vazhdon ende të kërkojë drejtësi.
“Në 25 vjetorin e këtij krimi makabër, familjarët, shoqëria dhe shteti ynë vazhdojnë të kërkojnë drejtësinë e munguar deri sot dhe dënimin e kriminelëve përgjegjës. Asnjëherë nuk do të harrojmë,” ka shkruar Krasniqi.
Ndërkaq, rikujtim pati edhe nga kryetari i Aleancës për Ardhmërinë e Kosovës, Ramush Haradinaj.
Përmes një postimi, Haradinaj ka shkruar se çdo ditë në kalendarin e shqiptarëve është dëshmitare e dhimbjes, por edhe e heroizmit.
“Ne fundin e marsit 1999, kur Kosova po digjej në të katër anët, bashkëluftëtarët e mi të Zonës Operative të Dukagjinit, thyen keq armikun në Betejën e Pozharit. Kjo betejë u shënua me emrat e heronjve të saj, Elez Geci e Maxhun Berisha,” ka shkruar Haradinaj.
Në Izbicë të Skenderajt u vranë 147 shqiptarë të pafajshëm, e Haradinaj e quan egërsi e barbarizëm.
“Egërsia e shtetit fashist serb, do të shfaqej po atë ditë në Izbicë, ku barbarisht do të vriteshin 147 shqiptarë të paarmatosur, mes tyre gra, fëmijë e pleq, përfshirë Dafinën gjashtëmuajshe”.
“Këtë ditë e kujtoj edhe për faktin se është dita kur themeluam Brigadën 137 Gjakova, brigada e parë urbane në Kosovë, përbërë nga bijtë e bijat më të mira të Atdheut,” shkruan Haradinaj.
“Secila ditë në kalendarin e shqiptarëve është dëshmitare e dhembjes e vuajtjes, por edhe e lavdisë, krenarisë e heroizmit.”