Kryetari i Bashkimit Demokratik për Integrim, Ali Ahmeti dhe kryetari i Unionit Demokratik Boshnjak, Munir Kolashinac, sot u dakorduan që edhe komuniteti boshnjak t’i bashkëngjitet Frontit fitues Evropian.
Nga BDI-ja njoftojnë se Kolashinac do të jetë pjesë e listave zgjedhore të Frontit Evropian për deputetë në Zonën e parë zgjedhore.
Ditë më parë, Fronti Evropian i iniciuar nga Bashkimi Demokratik për Integrim dhe kryetari Ali Ahmeti ka nënshkruar marrëveshje koalicioni me Partinë Demokratike Shqiptare të Menduh Thaçit, Aleancën për Shqiptarët të Ziadin Selës, Lëvizjen Populli të Skender Rexhepit Zejd, Partinë Demokratike Evropiane të Arjanit Hoxhës, Partinë Demokratike Turke të Bejxhan Iljas, Unionin e Romëve të Fatima Osmanovskës, Lëvizjen e Turqve të Maqedonisë për Drejtësi dhe Demokraci të përfaqësuar nga Sulejman Baki.
Fronti Evropian njëzëri mbështet kandidaturën e përbashkët për president të kandidatit Bujar Osmani, derisa dje kryetarët e të gjitha partive politike, pjesë të Frontit Evropian, nënshkruan deklaratë të përbashkët dhe u rreshtuan pas 10 zotimeve të tij në rolin e presidentit të shtetit./Telegrafi/