Ministrja e Drejtësisë, Albulena Haxhiu, ka thënë se akuzat në kuvend për kapje e ndërhyrje janë boshe dhe nuk kalojnë.
Ajo thotë se synimet janë që të pengohet reforma duke i mbajtur shpresat në Gjykatën Kushtetuese.
Përmes një postimi në Facebook, Haxhiu njoftoi se Grupi punues i Komisionit për Legjislacion po mban punëtorinë për trajtimin e Projektligjit për Këshillin Prokurorial, gjersa thekson se opozita po t’i kishte seriozisht shqetësimet rreth këtij ligji do të merrnin pjesë në punëtori.
“Po t’i kishin opozita seriozisht ‘shqetësimet’ e tyre në draftin e Ligjit për Këshillin Prokurorial, do të ishin të pranishëm në punëtorinë e organizuar nga Komisioni për Legjislacion. Grupi punues i Komisionit për Legjislacion po mban punëtorinë për trajtimin e projektligjit për Këshillin Prokurorial, i cili së fundi ka kaluar në parim. Një dokument shumë i rëndësishëm që parasheh reformën në KPK”, shkroi ajo.
Ajo theksoi se në këtë punëtori janë të pranishëm përfaqësues nga sistemi i drejtësisë, shoqëria civile dhe partnerët, por jo edhe opozita.
“Akuzat e pabaza në kuvend për kapje e ndërhyrje janë boshe dhe nuk kalojnë! Sigurisht synimet i kanë që ta pengojnë reformën dhe shpresat i mbajnë në Gjykatën Kushtetuese”, shtoi më tej ministrja.