Lista Serbe – partia më e madhe e serbëve të Kosovës, ka njoftuar se do të bojkotojë procesin e votimit për shkarkimin e kryetarëve shqiptarë të katër komunave me shumicë serbe në veri të vendit, i cili është caktuar për 21 prill. Gjithashtu, edhe anëtarët e komisioneve komunale zgjedhore (KKZ) në veri nga Lista Serbe dhe Nisma Qytetare për Liri, Drejtësi dhe Mbijetesë kanë dhënë dorëheqje.
Për këtë kanë reaguar shtetet e QUINT-it, ku kanë kërkuar që t’i rishqyrtojnë vendimet dhe qëndrimet e tyre në lidhje me zgjedhjet e 21 prillit.
“Ne e pranojmë se zgjedhjet e 23 prillit 2023 nuk dhanë zgjidhje politike afatgjatë për këto komuna dhe se qeverisja përfaqësuese në veri do të rikthehet kur të mbahen zgjedhjet për kryetarë komunash me pjesëmarrjen aktive të të gjitha komuniteteve.
Mirëpo, bojkotimi i votimit të 21 prillit nuk do të sjellë këtë rezultat dhe as nuk do të sjellë ndonjë përfitim për qytetarët që jetojnë në veri. Prandaj, i bëjmë thirrje Listës Serbe dhe të gjithë të tjerëve që kanë bërë thirrje për tërheqje, të rishqyrtojnë qëndrimet e tyre dhe të përdorin plotësisht mjetet demokratike në dispozicion për të avancuar demokracinë efektive dhe përfaqësuese”, thuhet në njoftime tyre.
Gjithashtu, QUINT-i i ka bërë thirrje edhe Qeverisë së Kosovës të jetë më e përgjegjshme ndaj shqetësimeve të qytetarëve gjatë këtij procesi.
“I bëjmë thirrje Qeverisë së Kosovës që të jetë e përgjegjshme ndaj shqetësimeve të qytetarëve të saj dhe të veprojë me profesionalizëm gjatë gjithë këtij procesi. Ftojmë të gjitha palët e interesuara që të veprojnë në atë mënyrë që të gjithë qytetarët që kanë të drejtë vote në veri të Kosovës të kenë mundësi të marrin pjesë”, thuhet më tej në njoftim.