Gjyljeta Ukella është gruaja e cila u vra në mëngjesin e sotëm nga bashkëshorti i saj në Pejë.
Për këtë rast tragjik, një familjare e së ndjerës ka folur në emisionin “Kosova today” në Klan Kosova.
Ajo tregoi se Gjyljeta ka pasur gjithmonë vuajtje, dhe zbuloi se bashkëshorti i së ndjerës ka një kohë të gjatë i papunë.
“Ka pasur probleme, ka qenë në depresion, por Gjyljeta e ka mbajtur afër. E ka mbrojtur familjen e vet, fëmijët dhe burrin e vet, dhe në fund u sakrifikua”, tha familjarja e së ndjerës.
Ajo tutje zbuloi se Gjyljeta pasnesër do ta festonte ditëlindjen e 43-të.
“Pasnesër do t’i mbushte 43 vjet. Komunikimi im i fundit me të ka qenë diku para 10 ditësh. Ajo sot është zgjuar, ka pirë kafen e mëngjesit dhe u bë gati për punë”.
Tutje, familjarja e gruas së vrarë tha se tre fëmijët janë te familja e saj.
“Gjyljeta e ka dashur shumë, atë që e deshi shumë, ia mori jetën”, u shpreh tutje familjarja, e cila tha se familja është jashtëzakonisht e tronditur.