Kontraktori i KEDS-it, Elektrosever, të premten ka filluar vendosjen e njehsorëve smart (të mençur) në pjesën veriore të vendit.
Sipas njoftimit të KEDS-it, këta njehsorë, janë të teknologjisë së fundit, që do të rregullojnë tutje distribuimin dhe furnizimin me energji elektrike për konsumatorët kosovarë të asaj pjese.
“Në procesin që ka filluar sot do të vendosen gjithsej 5 mijë njehsorë smart me fokus te konsumatorët që kërkojnë lidhje të reja dhe tek ata që nuk kanë njehsorë. Operimi me njehsorët smart është treguar tejet efikas dhe ka avancuar në mënyrë të vazhdueshme shërbimet dhe sigurinë e shpërndarjes dhe furnizimin me energji elektrike për konsumatorët. Rrjedhimisht, avantazhet dhe mundësitë që ofrojnë këta njehsorë janë të shumta”, ka njoftuar zyra për informim e kësaj kopmanie.
KEDS-i gjithashtu ka njoftuar se deri tash ka vendosur mbi 100 mijë njehsorë të tillë anekënd territorit të vendit.