Ministri i Mbrojtjes, Ejup Maqedonci, ka marrë pjesë në Ministerialin e Bashkëpunimit të Mbrojtjes së Evropës Qendrore dhe vendeve partnere të Ballkanit Perëndimor, që u zhvillua në Budapest të Hungarisë.
Maqedonci ka rikonfirmuar sërish orientimin strategjik të Kosovës për anëtarësim në BE dhe NATO.
Ministri ka kërkuar përkrahjen e vendeve pjesëmarrëse në këtë format, për realizimin e këtyre aspiratave të Kosovës dhe për të na mundësuar dhënien e kontributit për paqen dhe sigurinë në rajon dhe botë.
“Në adresimin e tij, ministri Maqedonci ritheksoi gjithashtu rëndësinë e mbështetjes së Ukrainës në luftën e saj të drejtë për ruajtjen e sovranitetit dhe mbrojtjen e integritetit territorial, ndërsa njëkohësisht i informoi të pranishmit për kontributin e vendit në mbështetje të Ukrainës, konform kapaciteteve dhe resurseve të vendit tonë”, thuhet në njoftim.
Maqedonci ka theksuar faktin që përgjegjësit e sulmit terrorist të 24 shtatorit në Banjskë të Zveçanit, vazhdojnë të jenë të lirë dhe të pandëshkuar për aktin e kryer.