Ambasadori i Shteteve të Bashkuara të Amerikës në Kosovë, Jeffrey Hovenier, pas takimit me kryetarin e Lidhjes Demokratike të Kosovës, Lumir Abdixhiku, ka thënë se “opozita e përgjegjshme politike luan një rol kritik në shoqëritë demokratike”.
Me anë të një postimi në llogarinë e tij në Twitter, Hovenier ka thënë se gjatë këtij takimi ka thënë se bashkë më Abdixhikun dhe zyrtarët e tjerë të LDK-së, ka pasur shkëmbim të mirë për një sërë prioritetesh të përbashkëta.
“Me ftesë të lidershipit të Lidhjes Demokratike të Kosovës, pata një shkëmbim të mirë me zyrtarët e LDK-së për një sërë prioritetesh të përbashkëta”, ka shkruar ai.
At the invitation of the Democratic League of Kosovo (@LDKzyrtare) leadership, I had a good exchange with LDK officials on a number of shared priorities. Responsible political opposition plays a critical role in democratic societies.
— Ambassador Jeff Hovenier (@USAmbKosovo) June 8, 2022
Ndërkaq, kreu i LDK-së, përmes një postimi në llogarinë e tij në Facebook, ka thënë se fokus në këtë takim ishin temat me interes nacional për Kosovën dhe partneritetin strategjik të vendit me SHBA-të.
“Me theks të veçantë, në këtë sesion u shtruan temat e proceseve integruese të Kosovës; dialogut të fasilituar nga BE, zhvillimit ekonomik e energjetik të Kosovës, qeverisjen e mirë, reformat në drejtësi si dhe partneritetin për mbrojtje e avancim të FSK-së”, ka shkruar Abdixhiku.
Duke e falënderuar ambasadorin Hovenier për mbështetjen që SHBA-të i kanë dhënë Kosovës në të gjitha etapat historike, Abdixhiku ka shprehur përkushtimin e LDK-së për avancimin e partneritetit jetik që Kosova ka me SHBA-të.
“Shpreha qartë qëndrimin e LDK-së se Kosova duhet të marrë përgjegjësitë e saj në avancimin e agjendës euro-atlantike dhe marrjes së vendimeve me interes nacional për vendin. LDK do të kujdestarojë relacionet strategjike me ShBA-të në të gjitha etapat e ardhshme zhvillimore të Kosovës”, shtoi ai.
Ndërkaq, sipas tij, ambasadori Hovenier ka shprehur gatishmërinë dhe vullnetin e administratës amerikane për të mbështetur Kosovën në sfera jetike të vendit.