Pasi Kosova dështoi që të jetë sot pjesë e agjendës së mbledhjes së Komitetit të Ministrave në Strasburg për anëtarësim në Këshillin e Evropës (KiE), ish-zëvendësministri i Punëve të Jashtme, Anton Berisha, e ka quajtur këtë një dështim të jashtëzakonshëm për Qeverinë e Kosovës.
Në emisionin “FIVE, Berisha e ka cilësuar këtë si ditën më të rëndë për Kosovën që pas shpalljes së pavarësisë.
“Anëtarësimi në KiE është rezultat i aplikimit të Qeverisë së Kosovës, kur ka aplikuar Kosova u desh të bënte gjitha veprimet që aplikimi të jetë i sukseshëm. Ky është një dështim i jashtëzakonshëm, dita më e rëndë për Kosovën që prej shpalljes së pavarësisë”, ka thënë Berisha.
Sot, Kosova ka dështuar të jetë pjesë e agjendës së mbledhjes së Komitetit të Ministrave në Strasburg.
Kryesuesja e deritanishme e Komitetit të Ministrave të Këshillit të Evropës, Dominique Hasler, tha se ky komitet po shqyrton se si të procedojë për pranimin e Kosovës në këtë organizatë.
Në agjendën e takimit të Komitetit të Ministrave, sipas ueb-faqes zyrtare të KiE-së, nuk u përfshi votimi për pranimin e Kosovës në këtë organizatë për të drejtat e njeriut.
Kosova veçse ka kaluar dy faza në procesin e pranimit në këtë organizatë, dhe Komiteti i Ministrave është ai që vendos nëse një shtet do të pranohet ose jo në Këshillin e Evropës.
Lexo edhe : KiE thotë se po shqyrton se si të procedojë për rastin e Kosovës