Kryetarja e Gjykatës Themelore në Prishtinë, Albina Shabani-Rama, ka thënë se gjyqtari kishe vendosur vetë për ta lënë të lirë, Enver Sekiraqën, të mbrohet në liri.
Ajo thekson se Kuçi e ka marrë këtë vendim pa u konsultuar edhe me dy anëtarët e tjerë të Trupit Gjykues, Medie Bytyqin dhe Ngadhnjim Arrnin.
“Në bazë të aktvendimit të datës PKR.nr.170/2020 te dt. 03.05.2024, evidentohet që gjyqtari Kuqi e ka marrë vetë si kryetar i trupit gjykues këtë aktvendim, ku edhe e ka cek në hyrje të aktvendimit ‘duke vendosur sipas detyrës zyrtare jashtë seancës; e nuk është nxjerrë aktvendimi në emër të trupit gjykues e jo siç e kërkon dispozita ligjore e nenit 366 të KPP-së. Ndërsa që aktgjykim burimor nuk ka pas në shkresa të lëndës që të vërtetohet se ka vepruar ndryshe”, thuhet në konfirmimin e kryetares së Themelores për “Betimin për Drejtësi”.
Më 3 maj, Sekiraqa u dënua me 25 vjet burgim për nxitje të vrasjes së policit, Triumf Riza dhe u mor aktvendim që t’i ndërpritet masa e arrestit shtëpiak dhe të mbrohet në liri.
Kurse, më 17 maj, Gjykata e Apelit vendosi ta kthejë në paraburgim derisa aktgjykimi të marrë formë të prerë.
Por, për rreth 10 ditë sa ishte i lirë që nga vendimi i 3 majit, Enver Sekiraqa duket se u largua nga Kosova.
Kështu ka bërë të ditur në “FIVE” të Dukagjinin avokati i tij, Besnik Berisha, duke shtuar se ai ka shkuar jashtë vendit për t’u trajtuar në një spital.
Kurse, Këshilli Gjyqësor i Kosovës, gjatë së martës, ka marrë vendim që ta suspendojnë gjyqtarin Kuçi.