Pos që po e shijojnë lojën e shahut, po kujtojnë edhe datën e njëjtë vetëm 23 vjet më parë.
Tema e diskutimit mes këtyre të moshuarve ishte Dita e Çlirimit të Prishtinës.
Njëri ndër ta që ishte edhe ushtar i Ushtrisë Çlirimtare të Kosovës tregon në detaje përjetimet e 11 qershorit të vitit 1999-të.
“Ajo ditë ka qenë shumë emocionuese, madje fëmija e përmendin: Babush kurr nuk ke qenë aq i emocionuar, kur kam shkuar dhe iu kam thënë “Ejani, ejani” ata thanë çfarë u bë duke menduar që duhet të ikim për Shqipëri ose diçka, por realisht unë po i thërrisja që ti presim trupat” , ka thënë ish-ushtari i UÇK-së, Enver Hoti.
E, Ismet Rexhepi këtë moment e vlerëson si një nga më të rëndësishmit në jetën e tij.
“Gëzim më të madh në jetën time nuk kam pasur sepse ka qenë lindja e dytë e popullit shqiptar, dha zoti e intervenoi NATO edhe hyri këmbësoria edhe e përjetuam një gëzim fort t’mirë”, është shprehur një qytetar, Ismet Rexhepi.
11 qershori i vitit 1999-të shënon ditën e hyrjes në Prishtinë të trupave të UÇK-së nga Zona Operative e Llapit.
Një ditë më vonë, nga bazat e tyre në Maqedoni kishin filluar hyrjen në Kosovë forcat tokësore të NATO-s. Nga ajo kohë, mbi tre mijë trupa të kësaj aleance, veri-atlantike vazhdojnë të qëndrojnë në kuadër të misionit paqeruajtës të KFOR-it.