Kryetari i parë i komunës së Prishtinës, i cili kishte ardhur në krye të kryeqytetit menjëherë pas çlirimit, është shprehur I pakënaqur me trajtimin që i bëhet tash.
Mexhid Syla, në një intervistë ekskluzive për Radio Dukagjinin thotë se asnjë kryetar komune, pasues të tij, nuk e kanë ftuar kurrë në asnjë seancë solemne për ditën e Prishtinës.
“Që prej seancës së parë, në njëvjetorin e çlirimit të Prishtinës të cilën e patëm organizuar në mënyrë madhështore, kurrë më nuk kam marr pjesë në ndonjë seancë solemne të kryeqytetit”, ka thënë Syla.
Syla që me profesion është avokat, thotë se nuk është I kënaqur me zhvillimin e Prishtinës në përgjithësi.
“Prishtina është ndërtuar shumë, por pa plan. Shihni lagjet që janë ndërtuar më herët, kanë shkolla, kanë kopshte, kanë gjelbërim, gjithçka që I duhet një lagjeje”.
Në këtë intervistë, Syla thotë se ditët e para të udhëheqjes së Prishtinës, kanë qenë shumë të rënda.
“Të mos them çdo ditë, por katër herë në javë, kam marr hapa qetësimi. Më vinin njerëz me lloj-lloj problemesh. Kërkonin familjarët e tyre të humbur. Kërkonin të ktheheshin në punë, kërkonin vend për qëndrim, meqë shtëpitë iu kishin djegur”.