Pas propozimit të Këshillit Prokurorial të Kosovës, presidentja e Republikës së Kosovës, Vjosa Osmani, ka dekretuar sot shtatë prokurorë.
Sipas njoftimit të Presidencës, këta prokurorë janë dekretuar me mandat fillestar për tre vjet, dhe do të sistemohen në Prokuroritë Themelore në Prishtinë, Pejë, Gjakovë dhe Ferizaj.
Në ceremoninë e betimit para Presidentes së vendit, Prokurorët e rinj janë betuar se “do t’i qëndrojnë besnik Kushtetutës së Republikës së Kosovës, ligjeve në fuqi dhe do t’i respektojnë rregullat e etikës profesionale”, është shkruar në njoftim.
Ndër të tjera, presidentja Osmani, gjersa u ka bërë thirrje prokurorëve të rinj që në punën e tyre të jenë të pakompromis ndaj krimit e korrupsionit, ka theksuar se shteti ligjor dhe i së drejtës është parakusht për funksionimin e shtetit dhe shoqërisë.
Njëherësh, presidentja ka theksuar se integriteti dhe profesionalizmi i prokurorëve janë elemente thelbësore, për një sistem të drejtësisë që garanton barazi për të gjithë dhe besim qytetar.
Me 22 prill të këtij viti, Kryeprokurori i deriatëhershëm i Shtetit, Aleksandër Lumezi, ia ka dorëzuar detyrën U.D. Kryeprokurorit të Shtetit, Besim Kelmendi.
Bëhet pranim-dorëzimi i detyrës së Kryeprokurorit të Shtetit