Zyra për Kosovën në Qeverinë e Serbisë ka thënë se drejtorit të saj, Petar Petkoviq, i është ndaluar vizita në Kosovë me rastin e festës së Vidovdanit.
“Që një vit e gjysmë, Petkoviqit është duke iu ndaluar udhëtimi në Kosovë dhe kremtimi i festave më të mëdha me serbët në provincë dhe mbështetja e tyre për shkak të ndalesave të jashtëligjshme nga Kosova”, ka thënë zyra serbe në një njoftim.
Sipas njoftimit, vizita e Petkoviqit u paralajmërua në “përputhje me të gjitha marrëveshjet e vlefshme për lëvizje të lirë” dhe se qëllimi i vizitës ishte kryekëput “i natyrës fetare”, por se kryeministri i Kosovës, Albin Kurti, “e ndaloi vizitën dhe kështu i shkeli të gjitha arritjet e bisedimeve në Bruksel”.
Portali Dukagjini ka dërguar pyetje në Ministrinë e Punëve të Jashtme të Kosovës në lidhje me këtë, por deri në publikimin e këtij artikulli nuk ka marrë ndonjë përgjigje.