Përfaqësuesi i Lartë i BE-së për Politikë të Jashtme e Siguri, Josep Borrell, ka thënë se vizita e kryeministrit të Hungarisë, Vikor Orban, në Moskë, bie ndesh me rregullat e Bashkimit Evropian.
Kjo pasi, sipas Borrellit, qëndrimet e BE-së për luftën ruse kundër Ukrainës përjashtojnë kontaktet zyrtare midis BE-së dhe presidentit rus, Vladimir Putin.
“Vizita në Moskë bie ekskluzivisht në marrëdhëniet dypalëshe midis Hungarisë dhe Rusisë. Kështu, kryeministri Orban nuk po përfaqëson BE-në”, ka shkruar Borrell në X.
Ndryshe, Orban mbërriti në Moskë një javë pasi Budapesti e mori udhëheqjen gjashtëmujore të presidencës së BE-së dhe tri ditë pasi Orbani ia paraqiti Kievit një propozim për armëpushim.
Orbani dhe ministri i Jashtëm hungarez, Peter Szijjarto, mbërritën në Rusi të premten në mesditë, ku Orbani pritet të takohet me presidentin e Rusisë, Vladimir Putin, sipas raportimeve të mediave ndërkombëtare.
Zëdhënësi i Orbanit e shpërndau një fotografi në rrjetet sociale, ku shihet Orbani në tepihun e kuq në Moskë. “Misioni i paqes vazhdon. Ndalesa e dytë: Moska”, shkroi ai.
Szijjarto e postoi një fotografi të veten duke zbritur nga avionin i Forcës Ajrore hungareze dhe shkroi: “Mbërritëm në Moskë. Një hap tjetër për paqe!”