Asociacioni i Gazetarëve të Kosovës (AGK) ka bërë të ditur se është liruar kameramani i emisionit “Betimi për Drejtësi”, Arianit Tahiri.
Tahiri, sipas AGK-së, ishte arrestuar dhe shoqëruar në Policinë e Kosovës sot derisa ishte duke realizuar një hulumtim për dyshimet për keqpërdorim të detyrës gjatë orarit zyrtar të disa prokurorëve.
AGK thotë se e ka mirëpritur lirimin tij pas mbajtjes së tij gjatë ditës në Prizren.
Në njotimin e AGK-së thuhet se media ku punon Arianit Tahiri ka njoftuar se ai është intervistuar në cilësinë e të dëmtuarit.
“Betimi për Drejtësi” kërkon nga institucionet e sistemit të drejtësisë dhe institucionet e tjera ligjzbatuese, që të marrin masa që rastet e tilla të pengimit të punës së gazetarëve dhe kameramanëve të mos përsëriten, pasi legjislacioni pozitiv garanton ushtrimin e profesionit të profesionistëve të mediave si dhe mbron në mënyrë adekuate pajisjet e punës së tyre. Njëherit, për gjithë këtë situatë të krijuar, ‘Betimi për Drejtësi’ fton Prokurorin e Shtetit që të adresojë përgjegjësinë e prokurorit Nixha dhe stafit të lokalit në Prizren, që kanosën dhe kundërligjshëm privuan nga liria kameramanin Tahiri”, thuhet tutje në njoftim.
Tutje, në njoftim thuhet se AGK-ja i bashkohet kësaj thirrjeje të emisionit “Betimi për Drejtësi” për hetime të plota për incidentin dhe marrjen e masave ndaj të gjithë përgjegjësve në mënyrë që të mos përsëritet në asnjë rrethanë kufizimi dhe frikësimi i gazetarëve gjatë kryerjes së punës së tyre.