Një grua në Kinë, e cila iu nënshtrua një ndërhyrjeje estetike në nofull me synimin për të përmirësuar pamjen, pretendon se operacioni pati pasoja të rënda, duke i ndryshuar ndjeshëm strukturën e fytyrës.
Pacientja, e identifikuar me pseudonimin Xiaoyu dhe me origjinë nga Wuhan, tha se kishte kërkuar vetëm një korrigjim minimal të nofullës së poshtme. Sipas saj, ndërhyrja duhej ta zhvendoste nofullën vetëm dy milimetra prapa.
Megjithatë, Xiaoyu pretendon se pas operacionit nofulla e saj ishte zhvendosur rreth 13 milimetra përpara, duke rezultuar në një pamje krejtësisht të ndryshme nga ajo që kishte pritur.
Ajo tha se pas ndërhyrjes fytyra e saj u bë më e zgjatur dhe asimetrike, ndërsa problemet me kafshimin, në vend që të përmirësoheshin, u përkeqësuan.
Gruaja, e cila më parë kishte punuar si modele, pretendon se ndryshimet në pamjen e saj ndikuan edhe në jetën profesionale, duke bërë që ajo të humbiste punën.
Sipas saj, ndërhyrjet dhe trajtimet e nevojshme për korrigjimin e dëmit mund të kushtojnë mbi 300 mijë juanë, apo rreth 38 mijë euro, ndërsa procesi i rikuperimit mund të zgjasë për një periudhë të gjatë.
Xiaoyu ka kërkuar ndërhyrjen e spitalit dhe të autoriteteve lokale shëndetësore për zgjidhjen e rastit, por sipas raportimeve, çështja vazhdon të mbetet e pazgjidhur./TAR