Asociacioni i Gazetarëve të Kosovës (AGK) ka reaguar pas miratimit në kuvend të Projektligjit për Komisionin e Pavarur të Mediave (KPM).
Sipas tyre, kjo është një goditje ndaj lirisë së mediave dhe tentim për kontroll nga partia në pushtet, Lëvizja Vetëvendosje.
“Asociacioni i Gazetarëve të Kosovës e ka pranuar me shqetësim miratimin në Kuvendin e Kosovës të Ligjit për Komisionin e Pavarur të Mediave. Lëvizja Vetëvendosje e kryeministrit Kurti, e ka miratuar ligjin me kuorumin minimal dhe pa prezencën e opozitës në sallë. Partia politike në pushtet nuk i ka marrë parasysh vërejtjet e shoqërisë civile e medieve, dhe ka shpërfillur Raportin e ekspertes së Këshillit të Evropës, që ka konstatuar se pjesa më e madhe e ligjit nuk i përmbush standardet evropiane, duke përfshirë ato të Këshillit të Evropës, ku Kosova synon anëtarësimin. Një gjë e tillë, u theksua sot para votimit edhe nga kryetari i Kuvendit, Glauk Konjufca”, thuhet në reagimin e tyre.
Më tej, në reagimin tyre thuhet se votimi i sotëm do të ketë efekt negativ në renditjen Kosovës në raportet ndërkombëtare për lirinë e medias.
“Votimi i sotëm është prej goditjeve më të mëdha që Qeveria e Kosovës dhe Vetëvendosje ka bërë kundër lirisë së medies në Kosovë, në një përpjekje të nisur qysh prej fillimit të mandatit për disiplinimin dhe kontrollimin e tyre. Votimi i sotëm do të ketë një tjetër efekt negativ në renditjen e vendit në raportet ndërkombëtare të fushës. AGK-ja bën thirrje për përdorimin e të gjitha mjeteve ligjore dhe kushtetuese për ta kundërshtuar hyrjen në fuqi të ligjit”, thuhet më tej në reagim.