Kanë përfunduar dy ndeshjet e sotme të Superligës së Kosovës, të vlefshme për xhiron e katërt.
Malisheva ka triumfuar kundër Ballkanit në stadiumin “Liman Gegaj”, me rezultat 3:2.
Golat për vendasit i realizuan Arbër Prekazi, Drilon Hazrollaj dhe Fatjon Bunjaku.
Ndërsa, për suharekasit shënuan Sunday Adetunji dhe Queven.
Duhet cekur se, skuadra e udhëhequr nga Bekim Isufi ishte me një futbollist më pak, që nga minuta e 45-të, kur u ndëshkua me karton të kuq mesfushori Etnik Brruti.
Malisheva është e katërta në tabelë me shtatë pikë, kurse Ballkani mbetet në vendin e parë me po aq pikë.
Fitore ka shënuar edhe Subareka kundër Gjilanit në shtëpi, me rezultat 3:2.
Për klubin e drejtuar nga Shpëtim Duro shënuan Mevlan Zeka, Nikola Stijepovic dhe Arvanit Rexhaj.
Derisa për gjilanasit topin në rrjetë e dërguan Robert Rrahmani dhe Senad Jarovic.
Gjilani mbetet pa fitore edhe pas xhiros së katërt dhe kështu renditet në pozitën e nëntë me vetëm dy pikë.
Ndërsa, Suhareka është e treta me shtatë pikë.
Java e katërt e Superligës së Kosovës do të mbyllet nesër me ndeshjen Drita – Ferizaj, që do të zhvillohet në stadiumin me bari sintetik në Gjilan, me fillim nga ora 16:00.