Kryeministri i Malit të Zi, Dritan Abazoviq, ka bërë të ditur se ura që do të lidhë Ulqinin me Velipojën, njëherësh do të lidhë 34 kilometra të plazhës ranore, të cilat vizitohen nga afro 530 mijë turistë në vit.
Përmes një postimi në Facebook, Abazoviq ka zbuluar disa informacione të reja për urën mbi lumin Buna që planifikon të lidhë dy qytetet bregdetare.
Gjatësia totale e urës do të jetë 310 metra, ndërsa hapësira ndërmjet dy shtyllave mbajtëse do të jetë 139 metra.
Distanca aktuale ndërmjet Ulqinit dhe Velipojës është 73 kilometra, ndërsa me ndërtimin e urës do të reduktohet në vetëm 1 kilometër.
Mes të tjerash, Abazoviq ka njoftuar se afati i planifikuar për përfundimin e punimeve është gushti i vitit 2024.
“Ne lidhim njerëzit! Ne po forcojmë ekonominë! Ne po ndërtojmë Malin e Zi”, ka thënë ai.
Të mërkurën e 8 qershorit, Kryeministrat e Malit të zi dhe Shqipërisë kanë prezantuar para publikut projektin e përbashkët infrastrukturor, ndërtimin e urës mbi Bojanë.