Ministri i Mbrojtjes, Ejup Maqedonci, ka njoftuar se Forca e Sigurisë së Kosovës (FSK) do të pajiset së shpejti me raketa amerikane Javelin, një hap ky që do të forcojë ndjeshëm kapacitetet e mbrojtjes së vendit.
Sipas ministrit Maqedonci, pjesa e parë e pagesës për këto sisteme raketash është ekzekutuar në mars të këtij viti, ndërsa kësti i dytë pritet të paguhet deri në fund të vitit.
“Ministria e Mbrojtjes është duke vazhduar me procedurat e prokurimit për blerjen e këtyre sistemeve në FSK. Në mars të këtij viti e kemi ekzekutuar pjesën e parë të pagesës për sistemin Javelin. Deri në fund të këtij viti do të ekzekutohet edhe kësti i dytë për sistemin Javelin dhe jemi në rrugën e duhur për të pasur këtë sistem në kohën e duhur në inventarin e FSK-së”, ka thënë Maqedonci në një konferencë për media.
Në lidhje me aeroportin e Gjakovës, Maqedonci konfirmoi se ky aeroport është tashmë funksional dhe se njësitë e FSK-së po operojnë me dronët Bayraktar nga ky aeroport.
“Sa i përket funksionalizimit të aeroportit të Gjakovës është për t’u theksuar se ai është funksional. Njësitet e FSK-së, më saktësisht ajo ajrore pa pilotë, është duke operuar me dronët Bayraktar në aeroportin e Gjakovës. Ne parashohim investime të rëndësishme atje me qëllim që ta bëjmë funksional dhe që të jetë i gatshëm që t’i përmbushë nevojat operacionale të FSK-së”, ka shtuar Maqedonci.