Shqipëria ka bërë një hap në rrugën e saj drejt anëtarësimit të plotë në Bashkimin Evropian (BE) duke hapur zyrtarisht kapitujt e parë të negociatave.
Fillimi i negociatave u bë i ditur në konferencën ndërqeveritare në Luksemburg, ku kryeministri Edi Rama ka përfaqësuar vendin.
Kapitulli i parë i hapur përqendrohet në sundimin e ligjit dhe përfshin pesë grupe kapitujsh që trajtojnë çështje si gjyqësori, drejtësia, funksionimi i institucioneve demokratike dhe reforma e administratës.
Në fjalimin e tij, Rama ka theksuar rëndësinë e këtij momenti në kontekstin e sfidave aktuale dhe krizave që po përballet rajoni.
Ai e ka lidhur procesin e integrimit me situatën globale, duke thënë se presidenti rus, Vladimir Putin me agresionin në Ukrainë ka sjellë një ndjesi zgjimi për vendet e Ballkanit.
“Faleminderit Varhelyi që na ka mbështetur për pesë vjet të gjata dhe sfiduese dhe jo fort të lehta, qëndroj këtu, është me të vërtetë një ditë e rëndësishme për Shqipërinë dhe shqiptarët, nuk na duhet një kujtesë e rëndësisë për të punuar së bashku, është e vërtetë në këto kohëra sfiduese ku një mori krizash na janë qasur me nevojën për tu bërë më pranë dhe qëndruar të gjithë së bashku dhe nevojën e mirëfilltë për t’u përballur me veten. Për fat të keq dhe këtë nuk e shmang dot pa e thënë, kjo ishte me ndihmën e Vladimir Putin, pra që ky proces mori një shpejtësi të re pas agresionit të tij në Ukrainë, shërbeu si një zile zgjimi”, ka deklaruar Rama.
Rama ka theksuar se është e padrejtë që vendet kandidate të përballen me vonesa dhe komplikime në procesin e integrimit, duke iu referuar refuzimit të rekomandimit të Komisionit Evropian.
“Çdo sukses i arritur në procesin e integrimit të Shqipërisë është një hap përpara për të gjithë rajonin”, ka shtuar Rama, raporton Dukagjini.
Ai ka shprehur besimin se tashmë rruga është e hapur për negociata thelbësore, duke nënkuptuar se tani do të negociohen kushtet për anëtarësimin e Shqipërisë në BE.
Oliver Varhelyi, komisioner Evropian për Fqinjësinë dhe Zgjerimin, e ka konfirmuar këtë duke deklaruar se “rruga është e hapur për negociata thelbësore”.
“Rruga është e hapur për negociata thelbësore. Do të thotë se tani do të negociojmë kushtet në të cilat Shqipëria do të jetë anëtare e Bashkimit Evropian. Kjo është ajo që po ndodh sot”, ka deklaruar Varhelyi.