Drejtoresha e Kulturës në Prishtinë, Sibel Halimi ka njoftuar se punimet të cilat po zhvillohen tek vendi i njohur si “Tuneli i Kurrizit” do të zgjasin rreth tetë muaj dhe përfundimisht kjo pjesë e njohur e kryeqytetit do të shndërrohet si skenë ngjarjesh kulturore.
Halimi përmes një postimi në rrjetin social “Facebook” ka theksuar se “Kurrizi” do të jetë hapësirë që frymon art dhe kulturë.
“Një nga hapësirat ikonike të kryeqytetit “Tuneli i Kurrizit” do të shndërrohet në një skenë ngjarjesh kulturore. Kurrizi’ si entitet arkitektonik, por dhe si artefakt kulturor përmban në vete kujtime domethënëse për rezistencën kolektive dhe shpresën për liri që e karakterizonte vetëdijen kulturore dhe politike të shqiptarëve të Kosovës gjatë eskalimit të opresionit gjatët viteve të ’90-ta. Prandaj, duke u kujdes të mbrohet ky artefakt identitar, në planin dinamik për tetë muaj, kjo hapësirë do të jetë një mundësi që të shërbejë si hapësirë që frymon art dhe kulturë”, ka shkruar Halimi.