Kryeministri i Kosovës, Albin Kurti, ende nuk është paraqitur në Prokurorinë Speciale, në të cilën ishte i ftuar për këtë të hënë nga ora 09:30 në cilësinë e dëshmitarit.
Ndërkohë, siç raporton ekipi në terren i TV Dukagjinit, gjatë kësaj kohe pranë kësaj prokurorie janë parë ministrja e Drejtësisë, Albulena Haxhiu dhe zëvendësi i saj.
Ndonëse vetë kryeministri Kurti nuk e ka komentuar këtë thirrje, zëdhënësi i Qeverisë së Kosovës Përparim Kryeziu, ka shkruar në Facebook se përmes kësaj ftese po tentohet ndikimi në rezultatin e zgjedhjeve të vitit 2025.
Kryeministri Kurti është thirrur nga Prokuroria Speciale si dëshmitar në hetimet për keqpërdorimin e rezervave shtetërore, që lidhen me dyshimet për shkelje të procedurave të prokurimit dhe përfitime të paligjshme nga zyrtarët e Ministrisë së Industrisë, Ndërmarrësisë dhe Tregtisë.
Për cilin rast është thirrur Kurti si dëshmitar nga Prokuroria Speciale?
Megjithatë kryeministri Kurti, një ditë më parë është lajmëruar nga Sllovenia ku po qëndron për vizitë zyrtare dhe ka zhvilluar disa takime.
Nuk dihet ende nëse Kurti është kthyer në Kosovë.