I akuzuari Naser Pajazitaj, sërish është dënuar me burgim të përjetshëm për vrasjen e Donjeta Pajazitaj.
Naser Pajazitaj ishte dënuar me burgim të përjetshëm nga Gjykata Themelore e Pejës, ndërkohë Gjykata e Apelit me aktvendim e kishte kthyer për rigjykim në Gjykatën Themelore në Ferizaj.
Ndërkohë, edhe Gjykata Themelore e Ferizajt e pati dënuar me burgim të përjetshëm Naser Pajazitajn, por Gjykata e Apelit e kishte rikthyer sërish në rigjykim, ndërkohë rasti po trajtohej në Ferizaj.
Por, në të tre rastet, aktgjykimet ishin anuluar nga Gjykata e Apelit, dhe Supreme dhe lënda ishte kthyer në rigjykim për të tretën herë.
Naser Pajazitaj akuzohet se më 9 nëntor 2015, në bjeshkët e Strellcit, Komuna Deçan në mënyrë mizore e ka privuar nga jeta viktimën Donjeta Pajazitaj nga po i njëjti fshat.
Viktima ishte marrë nga i pandehuri me veturë, dhe nga po i njëjti, dyshohej se ishte qëlluar me armë dy herë në kokë.
Kufoma e viktimës është gjetur më 17 dhjetor të vitit 2015, në vendin e ngjarjes nga disa kalimtarë të rastit.