Kryetari i Prizrenit, Shaqir Totaj, është kërcënuar përmes telefonit nga kryetari i Nismës në këtë komunë, Zafir Berisha.
Zëdhënësi i policisë në rajonin e Prizrenit, Vesel Gashi, ka konfirmuar për Portalin D se ky rast është paraqitur të shtunën e 25 qershorit në polici.
“Me datën 25.06.2022, viktima ka raportuar rastin në polici se ka qenë I kanosur përmes telefonit nga një I dyshuari Z.B për tre ditë. Pas pranimit të informatës, viktima është intervistuar lidhur me këtë rast. Eshtë njoftuar prokurori kujdestar, I cili ka dhënë urdhër që të intervistohet i dyshuari në cilësinë e të dyshuarit. Hetuesit nga Sektori i Hetimeve Rajonale e kanë shoqëruar të dyshuarin, është intervistuar dhe pas intervistimit i dyshuari është liruar në procedurë të rregullt. Në konsultim me Prokurorin Kujdestar, iniciohet rasti kanosje”, ka thënë Gashi për Portali D.
Ndër të tjera, Portali D është përpiqur të kontakojë me kryetarin e Nismës në këtë komunë, Zafir Berisha, mirëpo ky i fundit nuk është përgjigjur.
Ndryshe, Sinjali ka raportuar se Berisha dyshohet t’i ketë thënë Totajt se do ta ngrehë zhagas nëpër Prizren, para se ta prishin koalicionin, për shkak të drejtorëve të zgjedhur në shkollat atje dhe “të dashurave” të tyre.
Ai madje raportohet se ka “paralajmëruar” të parin e Prizrenit se nuk do ta lërë më kaq, me pretendimet se Totaj e ka shfrytëzuar atë gjatë fushatës zgjedhore.