Gjykata Kushtetuese e Republikës së Kosovës ka shpallur aktgjykimin në rastin KI171/24, të parashtruar nga Fejzullah Hasani, duke konstatuar shkelje të të drejtës për gjykim të drejtë dhe të paanshëm, të garantuar me Kushtetutën e Kosovës dhe Konventën Evropiane për të Drejtat e Njeriut.
Rasti lidhet me një konkurs publik të shpallur nga Universiteti i Prishtinës, për pozitën “Profesor Asistent” në Fakultetin Juridik. Hasani kishte aplikuar për këtë pozitë, por kandidatura e tij ishte refuzuar nga Senati i Universitetit me arsyetimin se nuk e kishte përmbushur kriterin e moshës.
Vendimi i Senatit ishte anuluar nga Gjykata Themelore dhe më pas konfirmuar nga Gjykata e Apelit. Mirëpo, Universiteti i Prishtinës kishte parashtruar kërkesë për revizion në Gjykatën Supreme, e cila më 7 maj 2024 kishte ndryshuar vendimet e shkallëve më të ulëta dhe kishte refuzuar padinë e Hasanit në tërësi.
Në vlerësimin e saj, Gjykata Kushtetuese konstatoi se Gjykata Supreme kishte dështuar të ofrojë arsyetim për vendimin e saj, nuk kishte trajtuar lejueshmërinë e revizionit dhe nuk ishte marrë me pretendimin për aplikim selektiv të dispozitave të Statutit të Universitetit të Prishtinës.
Gjykata Kushtetuese theksoi se vendosja e kufizimeve për ushtrimin e një profesioni, siç është kriteri i moshës, mund të bëhet vetëm me ligj dhe jo përmes akteve nënligjore siç është Statuti i Universitetit.
Si rezultat, Kushtetuesja shpalli të pavlefshëm aktgjykimin e Gjykatës Supreme dhe e ktheu çështjen për rishqyrtim, duke e obliguar që në rigjykim të adresojë të gjitha shkeljet procedurale dhe të sigurojë një vendim të arsyetuar dhe në përputhje me parimet e drejtësisë.
Ky vendim i Kushtetueses mund të ketë ndikim të drejtpërdrejtë në praktikat e konkursit publik dhe interpretimin e kritereve të përcaktuara në statutet universitare./Telegrafi