Lumir Abdixhiku, kryetar i Lidhjes Demokratike të Kosovës (LDK), ka reaguar ashpër pas akuzave që disa parti minoritare hodhën ndaj propozimit të LDK-së për formimin e një qeverie nacionale tranzitore.
Në një postim në Facebook, ai shprehu keqardhjen për mënyrën se si po instrumentalizohen këto parti minoritare dhe theksoi se kjo mund të dëmtojë përfaqësimin e pakicave dhe marrëdhëniet e tyre me partitë shqiptare.
“Keqardhje për keqpërdorimin që po u bëhet disa partive minoritare mbi propozimin tonë të fundit. Instrumentalizimi i tyre në përpjekjen e zgjidhjes politike e parlamentare, lë shenjë të rëndë në përfaqësimin e pakicave në Kosovë dhe marrëdhëniet e tyre me partitë shqiptare”, ka shkruari Abdixhiku, duke e cilësuar këtë veprim si një kopjim të dëmshëm të urrejtjes.
Abdixhiku ka thënë se disa përfaqësues minoritarë, anëtarë të kabinetit qeveritarë në detyrë, para mediave kanë akuzuar LDK-në se nuk i kishte përfshirë në propozimin për formimin e qeverisë tranzitore.
“Disa shkuan aq larg sa që për herë të parë në historinë e Republikës së Kosovës, e quajtën Lidhjen Demokratike – parti shoviniste,” theksoi Abdixhiku.
Ai shtoi se ky qëndrim është një “instrumentalizim i ulët i përfaqësuesve të komuniteteve që sot duhet të kenë përfaqësim dinjitoz me të gjitha partitë parlamentare shqiptare.”
Kreu i LDK-së ka mbrojtur vazhdimësinë e politikës së LDK-së për bashkëpunim ndër-shqiptar, duke theksuar se kjo është pjesë e misionit të partisë që nga vitet e ’80-ta.
“Të jesh shqiptar nuk është krim. Të kërkosh bashkim ndër-shqiptar nuk është krim. Të kërkosh unitet politik brenda shqiptarëve nuk është krim,” tha ai, duke shtuar se “Bashkëpunimi politik ndërshqiptar është mision politik i Lidhjes Demokratike të Kosovës, që nga viti 1989 e deri më sot.”
Më tej, Abdixhiku theksoi se përfshirja e minoriteteve ka qenë gjithmonë e garantuar me Kushtetutën e Kosovës, e hartuar nga LDK, por tani, për herë të parë, disa përfaqësues të komuniteteve joshumicë po mbajnë një qasje të hapur ndaj partive shqiptare, duke i kundërshtuar ato në mënyrë të polarizuar.
“Një qasje e tillë është e dëmshme dhe për komunitetet jo shumicë, dhe për demokracinë parlamentare,” theksoi ai.
Në fund, Abdixhiku ka shkruar edhe një pjesë të plotë të propozimit të LDK-së për Qeverinë Nacionale të Tranzicionit, ku theksoi se ajo do të formohej nga të gjitha partitë shqiptare dhe përfaqësuesit e komunitetit joshumicë, në përputhje me Kushtetutën, dhe do të kishte një program të qartë politik dhe ekzekutiv, me një kryeministër dhe kabinet unifikues.
“Qeveria Nacionale e Tranzicionit, e formuar nga të gjitha partitë shqiptare dhe, në përputhje me dispozitat kushtetuese, EDHE NGA PËRFAQËSUES TË PARTIVE TË KOMUNITETEVE JOSHUMICË, do të ketë afat të caktuar,” përfundoi Abdixhiku.
Ky qëndrim i LDK-së reflekton angazhimin e partisë për një qeveri që siguron përfshirje të plotë dhe të barabartë të komunitetit joshumicë, si dhe për një bashkëpunim të thellë politik ndër-shqiptar.