Hetuesit policorë nga Drejtoria për Hetimin e Krimeve Ekonomike dhe Korrupsionit, pas hetimeve disa mujore në bashkëpunim me Agjensionin për Zhvillimin e Bujqësisë kanë arrestuar 11 persona.
Në njoftimin e policisë thuhet se, të arrestuarit janë ndaluar për shkak se dyshohen se janë përfshirë në veprat penale “keqpërdorim i pozitës apo autoritet zyrtar”, “marrja e ryshfetit”, “dhënia e ryshfetit”, “mashtrimi me subvencione”, “falsifikimi i dokumenteve zyrtare” dhe “pengim i të provuarit apo procedurës zyrtare”.
Tre nga të arrestuarit janë persona zyrtarë, ndërsa tetë të tjerë janë përfitues subvencionesh, të cilët dyshohet se kanë përfituar subvencione përmes dhënies së ryshfetit dhe falsifikimit të dokumenteve.
Ky operacion ka përfshirë 6 komuna të Kosovës: Pejë, Istog, Deçan, Viti, Suharekë dhe Ferizaj.
Me aktvendim nga prokurori, të njëmbëdhjetë të dyshuarit janë dërguar në mbajtje për 48 orë.