Prokuroria Themelore në Prizren ka njoftuar se është ngritur aktakuzë ndaj të dyshuarit S.Ki cili ndodhet nën masën e paraburgimit që nga data 18 prill 2025. Ai po akuzohet për dy vepra të rënda penale: “Vrasje në tentativë” dhe “Mbajtje të paautorizuar të armëve”.
Sipas aktakuzës së ngritur, ngjarja ka ndodhur më 18 prill 2025 rreth orës 21:00, në rrugën “Xhevat Berisha” në Prizren. Pas një aksidenti komunikacioni dhe një fjalosjeje të shkurtër që pasoi, i pandehuri S.K. dyshohet se ka nxjerrë një brisk me hapje të llojit “Boker” me teh 9.5 centimetra dhe ka sulmuar dy herë me të viktimën N.B., duke i shkaktuar plagë të rënda trupore.
Mjeti i përdorur gjatë sulmit konsiderohet armë e ftohtë dhe është mbajtur pa leje, në kundërshtim me ligjin për posedimin e armëve, çka përbën veprën penale “Mbajtja në pronësi, kontroll ose posedim të paautorizuar të armëve”.
“Prokuroria Themelore në Prizren, Departamenti i Krimeve të Rënda, ka ngritur aktakuzë kundër të pandehurit S.K., i cili gjendet nën masën e paraburgimit nga data 18.04.2025 për shkak të dyshimit të bazuar mirë se i njëjti ka kryer veprat penale “Vrasja në tentativë” nga neni 172 lidhur me nenin 28 të KPRK-së dhe “Mbajtja në pronësi, kontroll ose posedim të paautorizuar të armëve” nga neni 366 par. 1 të KPRK-së. Sipas aktakuzës, me datë 18.04.20245, rreth orës 21:00 min, në Prizren, në rrugën “Xhevat Berisha”, i pandehuri S.K., pas një mosmarrëveshjeje paraprake, me dashje tenton të privoj nga jeta të dëmtuarin N.B., në atë mënyrë që pas një aksidenti që ka ndodhur me automjete dhe pas një fjalosje të shkurtër lidhur me aksidentin, i pandehuri e nxjerrë një brisk me hapje e llojit “Boker”, me gjatësi tehu 9.5 cm, dhe e godet dy herë të dëmtuarin, duke i shkaktuar dëmtime të rënda trupore, plagë prerëse dhe shpuese, të shkaktuara nga veprimi mekanik i mjetit të fortë dhe të mprehtë. Me këto veprime, i pandehuri ka kryer veprën penale “Vrasja në tentativë” sipas KPRK-së.
Po ashtu, i pandehuri, posedon armën e ftohtë – briskun me hapje “Boker”, me gjatësi tehu 9.5 cm, pa leje valide, në kundërshtim me ligjin e zbatueshëm mbi posedimin e armëve të ftohta. Me këto veprime, i njëjti ka kryer veprën penale “Mbajtja në pronësi, kontroll ose posedim të paautorizuar të armëve” sipas KPRK-së. Prokurori i çështjes me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri i lartëcekur për veprat penale për të cilat akuzohet të shpallet fajtor dhe të dënohet sipas ligjit.”, vijon njoftimi i Prokurorise.