Në prag të daljes në treg të lirë të energjisë, kryetari i Odës Ekonomike të Kosovës, Lulzim Rafuna, u ka bërë thirrje edhe një herë institucioneve që ta shtyjnë këtë vendim, pasi ka arsyetuar se do të ketë efekte të mëdha negative për bizneset dhe ekonominë.
Rafuna ka thënë se bizneset nuk po dalin kundër daljes në treg të lirë, por se vetëm po kërkojnë kohë.
“I bëjmë thirrje institucioneve, ekzekutivit i cili duhet të jetë në mbështetje të vendit, të gjej një zgjidhje dhe të kërkoj nga ZRRE që ta shtyjë vendimin sepse bizneset do të dëmtohen, por edhe qytetarët. Kërkesa jonë është të shtyhet për një kohë derisa të përgatitemi. Asnjë biznes nuk është kundër daljes në treg të lirë, bizneset kërkojnë kohë për përgatitje. Jemi duke folë për 1300 biznese që duhet me dalë në treg të lirë dhe janë biznese që e bëjnë 60% të ekonomisë së vendit. 300 biznese në prodhim”, ka thënë Rafuna në konferencë për media.