Shaip Kamberi do të jetë deputet në Parlamentin e Serbisë. Këtë e ka konfirmuar vetë ai, për Portalin Dukagjini, duke treguar edhe numrin e votave që ka marrë e që janë, gjithsej, 698.
“Po e konfirmoj, kam marrë 698 vota”, është përgjigjur Kamberi, në pyetjen se a është zgjedhur deputet.
Kamberi është deputeti i vetëm i cili, do t’i përfaqësojë shqiptarët në Parlamentin e Serbisë. Brenda një kohe të shkurtër, Kamberi ka qenë pjesë e procesit zgjedhor mbi katër herë, kjo për shkak të përsëritjeve të zgjedhjeve disa herë me radhë si shkak i parregullsive të ndryshme.
Ai, vazhdimisht, është ankuar se shteti serb me qëllim ka dashur që t’ia pamundësojë zgjedhjen e tij si deputet, në mënyrë që zëri i shqiptarëve të mos dëgjohet në parlamentin serb.
Zgjedhjet për herë të fundit janë mbajtur më 27 maj në Tërnoc të Luginës për parlamentin e Serbisë, ku deputeti shqiptar, Shaip Kamberi, nuk i kishte marrë votat e mjaftueshme.
Në mbështetje, Kamberit i kishte dalë i gjithë spektri politik në Kosovë.
Ky do të jetë mandati i tretë i tij, si deputet në parlamentin e Serbisë.