Sistemi i navigimit të avionit që po transportonte presidenten e Komisionit Evropian, Ursula von der Leyen, u ndërpre për shkak të një ndërhyrjeje të dyshuar nga Rusia, njoftoi Komisioni Evropian.
Një zëdhënës tha se “bllokimi i sinjalit GPS” ndodhi të dielën, në kohën kur presidentja e Komisionit ishte duke u afruar për të zbritur në Bullgari, por ajo arriti të ulej në mënyrë të sigurt.
“Sipas informacioneve që kemi marrë nga autoritetet bullgare, dyshohet se kjo ishte pasojë e një ndërhyrjeje të hapur nga Rusia,” u tha më tej.
Sipas Financial Times, duke cituar zyrtarë të paidentifikuar, von der Leyen është dashur të zbarkojë në Aeroportin e Plovdivit duke përdorur harta në letër.
Komisioni Evropian theksoi se “kërcënimet dhe aktet e frikësimit janë pjesë e rregullt e veprimeve armiqësore të Rusisë” dhe se ky incident vetëm sa do të forcojë angazhimin e BE-së “për të rritur kapacitetet e mbrojtjes dhe për të mbështetur Ukrainën”.
Qeveria bullgare konfirmoi se gjatë fluturimit “sinjali satelitor që transmetonte informacionin në sistemin GPS të avionit u neutralizua”.
“Për të garantuar sigurinë e fluturimit, shërbimet e kontrollit ajror ofruan menjëherë një metodë alternative uljeje duke përdorur mjetet tokësore të navigimit,” thuhet në deklaratë.
Zëdhënësi i Kremlinit, Dmitry Peskov, i tha Financial Times se ky informacion ishte “i pasaktë”.
Autoriteti i Shërbimeve të Trafikut Ajror të Bullgarisë i tha gazetës se ka pasur një “rritje të dukshme” të bllokimeve të navigimit që nga janari i vitit 2022, të cilat shkaktojnë kaos për fluturimet komerciale dhe transportin detar.
Von der Leyen ndodhej në Bullgari si pjesë e një turi në shtetet lindore të BE-së për të diskutuar mbi gatishmërinë mbrojtëse./BBC