Dogana e Kosovës ka sekuestruar rreth 20 mijë euro para të padeklaruara në pikën kufitare të Jarinjës.
Shuma është zbuluar gjatë një kontrolli rutinë të automjeteve që po hynin në territorin e Republikës së Kosovës.
Paratë u gjetën në posedim të një shtetasi serb, i cili nuk kishte bërë deklarimin sipas ligjit në momentin e hyrjes. Sipas autoriteteve, shuma përbëhej kryesisht nga dinarë serbë, ndërsa pjesa tjetër ishte në valutë euro.
Ligji i Kosovës parasheh se çdo shumë mbi 10 mijë euro që hyn ose del nga vendi duhet të deklarohet pranë autoriteteve doganore.
Mosdeklarimi përbën shkelje ligjore dhe i nënshtrohet procedurave administrative, ndëshkuese dhe hetimeve të mëtejshme.
Nga Dogana kanë thënë se ky rast tregon përkushtimin e tyre për të parandaluar kontrabandën financiare, pastrimin e parave dhe aktivitetet e tjera të paligjshme që rrezikojnë sigurinë ekonomike të vendit.