Ministri i Punëve të Brendshme, Xhelal Sveçla, ka thënë se gjatë vizitës zyrtare në Belgjikë, Kosova ka marrë mbështetjen nga shteti belg për anëtarësim në organizata ndërkombëtare.
Kështu ka bërë të ditur ministri i këtij dikasteri, përmes një postimi në llogarinë e tij në Facebook, ku ka treguar se është takuar me Zëvendëskryeministren e Ministren e Administratës Publike, Petra De Sutter.
“Me këtë rast Prof.Dr. Petra De Sutter shprehu gatishmërinë e saj për mbështetjen e shtetit belg në projektet e administratës publike si dhe anëtarësimin e Kosovës në organizata ndërkombëtare”, ka shkruar ai.
Sipas ministrit, gjatë këtij takimi është diskutuar për projekte konkrete në fushën e administratës publike, konkretisht në projektet në fushën e digjitalizimit të shërbimeve publike dhe procedurave administrative, proceset e rekrutimit si dhe në përmirësimin e sigurisë kibernetike.
Po ashtu, ai ka potencuar se “në këtë takim miqësor u dakorduam për nevojën e zgjerimit dhe fuqizimit të bashkëpunimit mes dy vendeve tona”.
Ministri Sveçla, ka shprehur falënderime për mbështetjen e vazhdueshme për Kosovën.
Ai e ka njoftuar zv.kryeministren për të arriturat e qeverisë në sundimin e ligjit e luftimin e krimit dhe korrupsionit.