Deputetja e LDK-së, Hykmete Bajrami, ka reaguar ndaj deklaratës së kryeministrit në detyrë, Albin Kurti, për renditjen e Kosovës si një nga vendet më të sigurta për investime sipas Indeksit Global të Rrezikut dhe Qëndrueshmërisë së Investimeve të publikuar nga organizata Henley.
Kosova, ndër vendet më të sigurta në botë për investime, njofton Kurti
Bajrami e konsideron këtë vlerësim të jashtëzakonshëm, por të paqartë, duke thënë se realiteti ekonomik i vendit është shumë larg këtij imazhi.
Në një postim në Facebook, ajo tha se pavarësisht renditjes së Kosovës përpara vendeve si Belgjika, Franca, Shtetet e Bashkuara dhe Japonia, realiteti ekonomik për qytetarët dhe bizneset është krejt tjetër.
“Albin ‘gjeniu’ e paska gjetë një organizatë “Henley & Partners” e cila e ka renditë Kosovën para Belgjikës, Francës, Shteteve të Bashkuara të Amerikës dhe Japonisë sipas Indeksit Global të Rrezikut dhe Qëndrueshmërisë së Investimeve. Po, në kohën në të cilën jetojmë edhe organizata të tilla mund të gjenden, por indeksimi nuk e ndryshon realitetin ekonomik.
Realiteti për të cilin Albin Kurti s’ka guximin me e nxjerrë asnjë gjysmë fjale, bile nuk guxon as në intervista me shku përveç nëse moderatori është përfitues i fondeve të qeverisë është ky:
Këtë vit çmimi i energjisë elektrike për bizneset është rritë deri në 300%,
Si rezultat i politikave të Qeverisë ka lulëzuar mafia energjetike,
Gjatë mandatit të qeverisë Kurti janë dhënë 3000 tendera të negociuar,
Gjatë mandatit të Kurtit kanë ikur mbi 250 mijë qytetarë nga vendi, shumica nga ata me viza pune dmth. punëtorë të kualifikuar,
Deficiti tregtar ka arritur në 5.4 miliardë Euro (2024),
Investimet kapitale janë ekstremisht të ulëta (deri më 1 shtator niveli qendror ka shpenzuar vetëm 198 milionë Euro),
Inflacioni është 4.7% (shator, 2025)
Normat e interesit janë ngritur tej mase,
Kosova është nën masa ndëshkuese të BE-së që nga viti 2023,
Jemi të vetmit në rajon që nuk kemi qasje në fondet e “Planit të Rritjes” dhe mbi të gjitha jemi vend pa Qeveri.
Hajde Albin, merri me vete krejt gjenitë që të rrethojnë e t’i rrahin krahet dhe përballemi në studio, me argumente për çka i ke bërë ekonomisë.
Për reputacionin e organizatës s’po flas, lexoni vetë. Unë lexova “The Guardian” çka shkruan”, ka shkruar Bajrami në Facebook.
