Qeveria në detyrë e Kosovës ka vendosur rritjen e pagës minimale për punëtorët, duke hyrë në fuqi me dy faza gjatë vitit 2026.
Ministri në detyrë i Financave, Hekuran Murati, njoftoi se nga janari i vitit të ardhshëm, paga minimale do të rritet në 425 euro.
Ndërkohë, nga korriku i vitit 2026, paga minimale do të arrijë në 500 euro.
“Pas miratimit të 350 euro të pagës minimale në vitin e kaluar, për sivjet janë pjekur kushtet që të rishikohet. Kësisoj, pas analizave që kemi bërë sa i përket impaktit që mund të ketë dhe pas diskutimeve që kemi pasur me përfaqësues të sindikatave dhe përfaqësues të bizneseve, propozimi ynë është që paga minimal për vitin e ardhshëm të bëhet 500 euro… Duke filluar nga paga 1 janar 2026, propozimi i MFPT-së është që paga minimale të jetë 425 euro në muaj për orar të plotë. Ndërkaq, duke filluar nga data 1 korrik – faza e dytë e pagës minimale – është niveli prej 500 euro pagë minimale në muaj”, ka thënë Murati.