Gjatë fjalimit të tij në Konventën e PDK-së, Enver Hoxhaj deklaroi se nuk ka marrë pjesë në garën për kryetar, pasi – siç tha – “nuk shoh kushte të barabarta” në këtë proces.
Ai theksoi se Konventa e PDK-së ka qenë gjithmonë një moment i rëndësishëm për vendin.
“Konventa e PDK’së ka qenë çdoherë një ngjarje e madhe për Kosovën. Po kur në konventë janë zgjedhje personalitet historike si Thaçi e Veseli, e ka vulos të kaluarën tonë të lavdishme të UÇK, luftën tonë për liri, por i ka dhanë drejtim edhe vendit”, u shpreh Hoxhaj.
Hoxha shtoi se PDK qëndron mbi themelet e lirisë dhe pavarësisë dhe se dëshira e tij është që “Thaçi, Veseli, baca Jakup, Selimi të kthehen Kosovës”.
Tutje Hoxhaj theksoi se nuk e pa procesin e sotëm si të hapur dhe gjithëpërfshirës.
“Kam pas dëshirë që kjo konventë… të ishte një ngjarje demokratike. A mund të bëhet demokratike nëse do të shtyhej për një javë? Mendoj që mes kohës dhe kualitetit, ne duhet të vendosim për kualitetin”, deklaroi ai, duke shtuar se një garë cilësore do të ishte ajo me më shumë kandidatë.
“Sot nuk ka kushte të barabarta, nuk shoh proces të barabartë, dhe unë, si i tillë, nuk marr pjesë në këtë garë. Por do ta respektoj vendimin e juaj… Mbi të gjitha e dua Kosovën, e tani e dua UÇK’në, e tani dua PDK’në, e tani Hashimin e Kadrinë e secilin prej jush në këtë sallë”, përfundoi Hoxhaj.