Presidenca e Kosovës ka konfirmuar se nesër, e enjte, presidentja Vjosa Osmani do të takohet me përfaqësuesit e partive politike.
Lajmi është konfirmuar nga Presidenca, për TV Dukagjinin në Debat Plus, dhe se takimi është planifikuar të mbahet në orën 10:30.
Kuvendi i Kosovës dështoi më 19 nëntor, e mërkurë, të miratojë Qeverinë e re, e cila do të udhëhiqej nga Glauk Konjufca i Lëvizjes Vetëvendosje. Nga 113 deputetë të pranishëm, 56 votuan pro, 53 ishin kundër dhe 4 abstenuan.
Kjo ishte përpjekja e dytë e Vetëvendosjes për të formuar Qeverinë, pas dështimit të mandatit të parë të Albin Kurtit më 26 tetor.
Sipas Kushtetutës, nëse as mandatari i dytë nuk arrin të formojë Qeverinë, presidentja Osmani duhet të shpallë zgjedhjet e reja, të cilat duhet të mbahen brenda 40 ditëve nga shpallja.
Nesër është e mundshme që në takimin me partitë politike, presidentja Osmani me partitë politike të caktojë datën për zgjedhjet e reja.