Zyrtarë të lartë amerikanë dhe ukrainas do të takohen këtë të dielë në Florida për të diskutuar në detaje kornizën e re të propozuar nga Uashingtoni për t’i dhënë fund luftës së Rusisë në Ukrainë – në një moment kur Kievi po përballet me presion të madh ushtarak dhe politik.
Në takim pritet të marrin pjesë sekretari amerikan i shtetit, Marco Rubio, i dërguari special Steve Witkoff dhe Jared Kushner, dhëndri i Donald Trump.
Delegacioni ukrainas do të udhëheqë bisedimet para takimeve të planifikuara të SHBA-së këtë javë në Moskë me Vladimir Putinin.
Takimet zhvillohen ndërsa Rusia ka kryer një tjetër fundjavë sulmesh të rënda ndaj Ukrainës, ku të paktën gjashtë persona u vranë dhe dhjetëra të tjerë u plagosën. Një sulm me dron pranë Kyiv-it të shtunën vrau një person dhe plagosi 11 të tjerë.
Një burim i sigurisë në Ukrainë tha se Kievi ishte përgjegjës për sulmet me dronë detarë ndaj dy tankerëve të naftës në brigjet turke të Detit të Zi, të cilët dyshohet të kenë transportuar fshehurazi naftë të sanksionuar ruse.
Bisedimet në Florida pritet të fokusohen në detajet e një draft-marrëveshjeje për t’i dhënë fund luftës, tre vjet pas pushtimit të plotë të Ukrainës në vitin 2022.
SHBA-ja ka rishikuar versionin fillestar të planit pas kritikave nga Ukraina dhe vendet evropiane se ishte shumë i favorshëm për Rusinë. Përmbajtja e draftit aktual nuk është bërë ende publike. Witkoff pritet të udhëtojë në Moskë javën e ardhshme.
Plani fillestar me 28 pika – hartuar muajin e kaluar nga emisari i Putinit, Kirill Dmitriev, dhe Witkoff – parashikonte që Ukraina të tërhiqej nga disa qytete në Donbasin lindor, të kufizonte madhësinë e ushtrisë dhe të heqte dorë nga anëtarësimi në NATO.
Ai gjithashtu do të nënkuptonte njohjen faktike nga SHBA-ja të Donetskut, Krimesë dhe Luhanskut si territore ruse.
Gjatë negociatave të javës së kaluar në Zvicër, të udhëhequra nga Rubio dhe përfaqësuesit ukrainas, plani u ndryshua ndjeshëm.
Ukraina dhe partnerët evropianë theksojnë se çdo diskutim territorial duhet të nisë nga vija aktuale e frontit dhe se nuk mund të ketë njohje të territoreve të pushtuara me forcë nga Rusia. Gjithashtu insistojnë se Ukraina duhet të vendosë vetë për integrimin në BE dhe NATO, pavarësisht kundërshtimeve të Moskës.
Presidenti ukrainas, Volodymyr Zelenskyy, tha se pret që rezultatet e takimeve të fundit në Gjenevë me SHBA-në të konkretizohen në Florida.
Bisedimet zhvillohen në një kohë të trazuar për qeverinë e Ukrainës, pasi shefi i kabinetit të Zelenskyyt, Andriy Yermak, u detyrua të japë dorëheqjen të premten pas një hetimi anti-korrupsion. Yermak ishte negociatori kryesor i Ukrainës me SHBA-në.
Delegacioni ukrainas në Florida përfshin komandantin e forcave të armatosura, Andrii Hnatov, ministrin e jashtëm Andrii Sybiha dhe kreun e Këshillit të Sigurisë, Rustem Umerov.
Ndërkohë, Ukraina është nën presion të madh për të pranuar një marrëveshje, teksa Rusia po bën përparime të vogla në vijën e frontit dhe qytetet ukrainase po përballen me ndërprerje të gjata të energjisë si pasojë e bombardimeve të vazhdueshme ruse ndaj rrjetit elektrik.
Ambasadori i Ukrainës në Britani dhe ish-komandanti i përgjithshëm i ushtrisë, Valerii Zaluzhnyi, paralajmëroi se një “paqe e nxituar” do ta çonte Ukrainën drejt disfatës dhe humbjes së pavarësisë. Ai tha se “garancitë efektive të sigurisë” janë thelbësore për çdo marrëveshje.
Presidenti francez Emmanuel Macron do të takohet me Zelenskyyn të hënën në Paris. Ministri i jashtëm francez deklaroi se paqja është e mundur vetëm nëse Putini heq dorë nga ambicia e tij për ringritjen e një “perandorie sovjetike” përmes nënshtrimit të Ukrainës.
Ai paralajmëroi se Rusia ose duhet të pranojë një armëpushim, ose të përballet me sanksione të reja dhe mbështetje të shtuar evropiane për Kievin./TheGuardian