Meta ka nisur të fshijë llogaritë e fëmijëve australianë nën moshën 16 vjeç nga platformat e saj Instagram, Facebook dhe Threads, një javë para se të hyjë në fuqi ndalimi zyrtar i përdorimit të rrjeteve sociale për adoleshentët.
Kompania ka nisur javën e kaluar t’u njoftojë përdoruesve të moshës 13-15 vjeç se llogaritë e tyre do të fshihen duke nisur nga 4 dhjetori.
Parashikohet që rreth 150,000 përdorues të Facebook dhe 350,000 llogari Instagram të preken nga kjo masë. Threads, e ngjashme me X, mund të përdoret vetëm përmes një llogarie Instagram.
Ndalimi i rrjeteve sociale për të rinjtë në Australi, i pari i këtij lloji në botë, nis më 10 dhjetor.
Kompanitë që nuk marrin “masa të arsyeshme” për të parandaluar përdorimin nga të rinjtë nën 16 vjeç rrezikojnë gjoba deri në 49.5 milion dollarë australianë (rreth 33 milionë dollarë amerikanë).
Një zëdhënëse e Meta tha për BBC se “përputhja me ligjin do të jetë një proces i vazhdueshëm dhe me shumë shtresa”.
Ajo shtoi se një qasje më efektive dhe e standardizuar për verifikimin e moshës dhe privatësinë do të ishte më e përshtatshme. Meta sugjeroi që qeveria të kërkojë nga dyqanet e aplikacioneve të verifikojnë moshën e përdoruesve dhe të kërkojnë miratimin e prindërve për ata nën 16 vjeç, për të eliminuar nevojën e verifikimit në çdo aplikacion veç e veç.
Përdoruesit që identifikohen si nën 16 vjeç mund të shkarkojnë dhe ruajnë postimet, videot dhe mesazhet e tyre para se llogaritë të çaktivizohen. Ata që mendojnë se janë kategorizuar gabim mund të kërkojnë rishikim duke dërguar një “video-selfie” ose duke ofruar dokument identifikimi të qeverisë ose patentë shoferi.
Përveç Meta, ndalimi i Australisë prek edhe platformat YouTube, X, TikTok, Snapchat, Reddit, Kick dhe Twitch. Qeveria thotë se ndalimi ka për qëllim mbrojtjen e fëmijëve nga efektet negative të rrjeteve sociale, por kritikët paralajmërojnë se kjo mund të izolojë disa grupe dhe t’i shtyjë fëmijët drejt platformave më pak të rregulluara.
Sipas një studimi të qeverisë, 96% e fëmijëve australianë 10-15 vjeç përdorin rrjete sociale, dhe shtatë në dhjetë kanë hasur përmbajtje të dëmshme si materiale mizogjene, dhunë, përmbajtje që promovon çrregullime të të ngrënit ose vetëvrasjen. Një në shtatë raportoi përvojë të ngacmimit nga të rritur ose fëmijë më të mëdhenj, dhe më shumë se gjysma thanë se kishin qenë viktima të cyberbullying-ut.