Eksperti i sigurisë Fadil Kajtazi ka folur në emisionin FIVE në RTV Dukagjini lidhur me pajisjen e Forcat e Sigurisë së Kosovës me sistemin raketor antitank OMTAS, duke sqaruar aspektet ligjore dhe duke shprehur shqetësime për zgjedhjen e këtij sistemi.
Kajtazi tha se sipas Dokumentit të Vjenës të OSBE, shtetet anëtare janë të obliguara të deklarojnë nomenklaturën e armatimit që posedojnë, por se ky obligim nuk vlen për Kosovën, pasi ajo nuk është pjesë e kësaj organizate.
“Ta paraqesin në tri dimensione atë që e blejnë: sasinë, përdorimin taktik dhe planet e përdorimit. Këto gjëra janë të mbyllura, mirëpo se çfarë posedon një ushtri, të gjitha shtetet anëtare të OSBE-së janë të obliguara ta deklarojnë. Sekret mbeten planet operacionale dhe planet e luftës – stërvitja, planet e mobilizimit, komanda, ato janë anë sekrete”, ka deklaruar Kajtazi.
Megjithatë, ai ka ngritur pikëpyetje për zgjedhjen e sistemit të armatimit, duke theksuar se e shqetëson fakti pse është zgjedhur sistemi turk dhe jo FGM-148 Javelin.
“Pse është sistemi turk e nuk është Javelini? Kjo për mua është shqetësuese për arsye se kjo është një armë e mirë, është armë taktike e vijës së parë, mirëpo ne shqiptarët në raport me serbët betejat i kemi fituar çdo herë, luftërat i kemi humbur. Të vetmen luftë që e kemi fituar në nivel strategjik ka qenë lufta e fundit, edhe pse e kemi humbur në nivele taktike”, ka thënë Kajtazi.