Kuvendi i Republikës së Kosovës është konstituuar sot me seancën e parë konstituive të Legjislaturës së 10-të.
Po ashtu, janë zgjedhur edhe nënkryetarët e Kuvendit, të cilët janë votuar në pako.
Nënkryetarë të rinj të Kuvendit të Kosovës janë Ardian Gola i Lëvizjes Vetëvendosje, Vlora Çitaku e Partisë Demokratike të Kosovës, Kujtim Shala i Lidhjes Demokratike të Kosovës, Emilja Rexhepi nga grupi multietnik dhe Sllavko Simiq i Listës Serbe.
Morën mbështetjen e 104 deputetëve, tre votuan kundër dhe gjashtë abstenuan.
Kryetarja e sapozgjedhur e Kuvendit të Kosovës, Albulena Haxhiu, shpalli të konstituuar Kuvendin, pas zgjedhjes së saj dhe të pesë nënkryetarëve.
Haxhiu ka paralajmëruar edhe një seancë tjetër, atë për votimin e Qeverisë së re të Kosovës.
Me konstituimin e Kuvendit, është hapur rruga për vazhdimin e procedurave kushtetuese për formimin e Qeverisë së Kosovës, proces i cili pra pritet të vazhdojë sot.
Presidentja e Kosovës, Vjosa Osmani, më herët kishte theksuar rëndësinë e krijimit sa më të shpejtë të institucioneve, përfshirë miratimin e buxhetit dhe marrëveshjeve ndërkombëtare.